KATTEMAT

Nytt frå gata

eit sjenert pinnsvin.
















denne er ny. framleis prislapp i.

ok, denne var strengt tatt ikkje på gata, men i eit butikkvindauge. ein dvd som heiter "brunstige råbukker". må sjåast

i dag slo eg opp ordet "kondrom" i framandordboka. der leste eg at det var ein "brukssvulst". lurar på kva ein brukar den til. men eg hadde lest feil. det var brusksvulst. skuffa.

ting på gata

i natt drøymde eg at eg var mama cass, og at eg akkurat hadde bestilt det skinkesmørbrødet som skulle ta livet av meg. eg forsto at dette var mitt siste smørbrød nokon sinne. likevel tok eg ein bit. ingenting hendte. eg tok ein bit til. snart var alt ete opp. eg var ikkje død. slik kan me ikkje ha det tenkte eg, og bestilte eitt til.

heilag heilag heilag er påsken, og då går det ingen buss

ja, så var det påske, og dei av oss som er vane med å bruke kollektivtransport veit at å komme seg frå A til B kan vere ei tolmodsprøve når Den Norske Kyrkja feirar ulike hendingar i Frelsarens liv. HardangerSunnhordalandskeDampskipselskap har blitt til Tide, og med dette følgjer nye og artige ruteendringar som er endå artigare enn dei gamle og artige ruteendringane som fanst før framsteget. nett no sit eg i ein ventehall (denne har varme og til og med ein kafe (den er rett nok ikkje open, men som kjend er det tanken som tel), så dette er ikkje ille tatt i betraktning at eg befinn meg på bygda) og “ventar” på ein buss som aldri kjem. det er skjærtorsdag, og rutetelefonen har gitt ulike opplysningar om kva bussar som faktisk går vidare innover bygdene til ulike folk som skal dit. eg sit nett no og høyrer på ei lita gruppe folk som skal i same retning (dei kjenner kvarandre ikkje), og som har funne ut at det slett ikkje går nokon buss i det heile. dette er dumt. også for meg, for eg skal i same leia, og det er fem mil, sludd og heilagdag, så det kjem ikkje på tale å haike. eg trur NSB må komme med ei hjelpande hand her, slik at det ikkje går tog heller når det ikkje går buss, slik at tåper som stolar på rutetabellar ikkje risikerer å bli sitjande fast i midt i huttiheita fordi nokon er for late til å jobbe. ja, eg meinar for late! eg jobbar i helsevesenet, og der er det ikkje noka bøn. må på jobb. jesus eller ei. og medan eg sit her og fordriv tida med å vere negativ på ein positiv måte, har eg tid til å ta innover meg dagens inntrykk og tenkje over fex når ein er gammal nok til å lure på kva som er gale med dagens ungdom? kvifor er par på ferie eklare enn andre par? kva er det som er gale med gamle folk? eg er ikkje 30 eingong. men dagens ungdom! er det fleire enn meg som tykkjer det er ekkelt når jenter som åpenbart ikkje er over dokkestadiet er utmaia som horer når dei har så barnslege fakter og leikar barnslege leikar (eg såg nokre overdolla under 10-åringar medan eg venta på toget i bergen)? då eg var ni måtte eg fint ha på meg det mor mi bestemte eg skulle ha på meg, med eit og anna tilskrike klesplagg som ei rosa jakke eller joggesko med teikneseriemotiv. men det var ikkje berre meg. alle dei andre ungane hadde det også slik. til og med dei kulaste i klassen. rett nok er eg frå bygda, men er det ikkje noko med tida også? kjære lille venn, du er 8. du treng ingen tanga eller tube-top. du treng parkas (gjerne rosa, dersom det er viktig) og polvottar. og forresten, så treng du heller ikkje friis-veske til 1500 spenn. du treng ein god ransel. og medan eg ser på at det spanske kjærastparet sit og klår på kvarandre som om ventehallen her skulle vere eit hotellrom, høyrer eg på det eldre ekteparet som skal i samme retning som meg, som no har vore ute og spurt ein bussjåfør om han ikkje kan køyre dei til Sekse i bussen sin. det er sikkert 7 mil. + ferje. og nei han kunne ikkje køyre dei gitt. han skulle ein heilt annan retning...

resirkulering

på jobben min tek dei klimaet på alvor (det gjer ikkje eg). dei har byrja å kjeldesortere avfall i stor stil. eg trur at all plasten som blir sendt til resirkulering blir brukt til å lage plastsekkar til resirkulering av plastavfall. iallefall er det heilt sikkert at det samla volumet av plast som blir lagt i spesielle sekker til resirkulering av plast er mindre enn volumet til sekkene som blir brukt til innsamlinga av plast til resirkulering. men resirkulerast skal det. Uansett, samma Faen.

Moderne skikk og bruk; noko for Toppen? #1

I dag startar vi ein ny spalte her i negativ/positiv. "Moderne skikk og bruk; noko for Toppen? " vil komme her med ujamne mellomrom (eller ikkje), og Toppen er sjølvsagt heile noregs skikk og bruk-guru, Toppen Bech. No har ho sjølvsagt ingenting med 10-33 å gjere, men ho burde kanskje lese dette og komme med innspel til problemstillingar ho aldri sjølv hadde kome på. det dukkar stadig vekk opp nye situasjonar i vårt moderne samfunn som treng ein heilt ny etikette, og eg tenkjer ikkje på om kor lang tid det skal gå før ein svarar på ein sms, som visstnok er slikt TB styrer på med i dag. men kanskje negativ/positiv sine lesarar har noko å bidra med?

I DAG:

Kva gjer ein når ein treff ekskjærasten sin på gata, og det viser seg at han/ho sel "Megafon"?

10-33 foreslår:

A: lest som ein ikkje ser vedkomande, og går i motsett retning?
B: seier: "jasså, fått ny jobb? ligg det noko pengar i dette, då?"
C: gir han/ho 200 spenn til fix?
eller det mest freistande:
D: seier: "kva var det eg sa?"

ynskjer innspel!

hjelp

10-33. umiddelbart behov for assistanse. ja.

denne lappen sto i eit forretningsvindauge i Utlandet. trass språkforvirring trur eg vi kan slå fast at det ikkje finst noko slikt som hippe kapper. utanom kanskje i tryllekunstnar- og gåffmiljø.

å, eg saknar min gamle kåk. no tenkjer eg på han i eit rosenraudt skjær. å det var ein fin kåk.

blæ. gapar gjerne eg. raff grafitti.

esoterisk vs eterisk

menn er ein sjølvsikker rase. det vil i mange tilfelle ikkje falle dei inn at dei nyttar framandord på feil måte. men no har eg sett meg lei på at fleire menneske med penis rotar med esoterisk og eterisk. her er det ordboka seier:

esote´risk, adj., gr., hemmelig, bestemt for de innvidde (mots. eksoterisk).
ete´risk, adj., som har eterens egenskaper; luftig, klar, himmelsk, overjordisk; (kjem.) flyktig.
SLÅ DET OPP!

fleire para! (sjå førre postering for å bli opplyst)

ting du ikkje ante at du trengte å vernast mot, og nokre nyttige:

paranoia: mot noia
paragliding: ganske enkelt broddar
paralell: mot vendingar brukt av Alf Prøysen (parallell: ei line som overalt har like stor avstand til ei anna line)
paradis: mot lett skodde
parafin: mot 10-33 (sin uimotståelege charme)
paradere: dette er sjølvsagt bokmål. på norsk heiter det paradykk
parat: vel, mot bokstaven t
paramilitære: mot verneplikt

ok. no nok, men kom gjerne med forslag

Vi er einige om at "para" må på ein måte bety vern mot noko, ikkje sant? Og sjølv om ein paraply er til vern mot regn, og ikkje mot ply, og parasoll mot sol og ikkje soll, så må vi berre tolke ut frå tydingane til desse orda at para vernar mot td det normale (paranormal, så klart), mot visuelle matteuttrykk (paragraf), mot samlingar av fæle stikkedyr eller slangar (parabol), mot språklege plattheiter (parafrase) og mangt og mykje anna. Fleire vil følgje.

I dag: 10-33 vitjar den 3. verda

Storbritannia

Eg var nyleg i London. Triveleg stad det. Eg har vore der fleire gonger. Men ein ting ein bør vite før ein dreg dit, er at sjølv om Store Britannia har rykte på seg å vere eit i-land, så har befolkninga der enkelte særpreg som brukar å tilhøyre “dei som ikkje har noko, men er lukkelege og sjenerøse trass i at dei har null pengar eller mat og aldri har smakt kjøt" (dette er sjølvsag sett på spissen. Det er ikkje mogeleg å vere lukkeleg dersom ein aldri har smakt kjøt). Til dømes er dei blide sjølv om det har drittjobbar. Dei dinglar med hovudet, smiler og seier darling uansett samme faen. Dei er fullstendig likegyldige til om det er mogleg eller ei å ta seg fram frå punkt A til punkt B. Dei legg gjerne ned halve t-banen i helgene, og dersom du vil ut og fly, kan du ta deg faen på at flytoget ikkje går den aktuelle dagen. Eg skulle fly frå Stansted i går. Kom etter mykje om og men til Liverpool st. via eit delvis nedlagt t-banenett, og der var perrongen til flytoget sperra av. Eg spurte ein mann i gul refleksvest med tydelege teikn på at han jobba der om korleis eg skulle komme meg til flyplassen. Han trakk på skuldrane, smilte og dingla med hovudet. Han sa: I don’t know dear. Og at eg skulle spørje på informasjonskontoret, og han peika vagt i ubestemmeleg retning. Eg gjekk vagt i ubestemmeleg retning. Eg kom til noko som minna vagt og ubestemmeleg om informasjonskontor, men det såg stengt ut (klokka var ti over seks om morgonen, men flytoget byrjar å gå klokka fire, så problemet var ikkje at eg var for tidleg ute, neida). Etter ei stund fann eg ein mann med ei hue som det sto “Stansted Express” på. Han var ikkje så flink i engelsk, men fekk til slutt forklart at eg måtte ta ein buss som kom snart, til sånn og sånn stasjon, og at eg der måtte byte til tog. Dette skulle ta like lang tid som ekspressen vanlegvis tek, altså 46 minutt. Eg steig så på bussen, som aldri byrja å røre seg. Folk (dvs utlendingar som meg, som var i majoritet) byrja å bli hissige og redde for å miste flya sine. Eg var roleg, eg har aldri mista eit fly, passar alltid på å ha ein time ekstra i tilfelle inkompetanse (min eigen eller andre sin) eller som eit 3. verden tillegg (som i dette tilfellet). Etter ei stund rørte bussen på seg, og etter omlag 20 minutt kom vi til den aktuelle togstasjonen. Eg merka at tida hadde byrja å ete eg inn i inkompetansetillegget mitt, men eg rekna ut at dersom toget brukte så lang tid som var lova ville eg framleis rekke fram til flyplassen ein halvtime før innsjekkinga stengte. Etter 3 kvarter med tog utan at nokon flyplass let til å vere i umiddelbar nærleik, byrja eg å uroe meg, men etter nok eit kvarter var vi endeleg framme, og folk byrja å springe for å rekke flya sine. Eg høyrde at nokon gjorde narr av dei som sprang, så eg nøyde meg med å gå så fort eg kunne (i tillegg hadde eg sjølvsagt ein tung sekk, men eg må innrømme at eg set lite pris på å bli gjort narr av). Ok, eg rakk det fint. Kom fram til innsjekkinga ti minutt før stengetid, og det var ingen kø, men iallefall vil eg oppmode om å ha eit inkompetansetillegg sjølv om ein er fullstendig i stand til å tog på eiga hand, for det kan hende at alle andre er fullstendig inkompetente. Noko dei andre gjerne er. Det var alt. Takk for merksemda. Eller ikkje.

eg er ganske sikker på at dette er ein veg som fører til Sikt. og på Sikt blir alt bra. eg angrar no på at eg ikkje følgte vegen då eg hadde han der framfor meg, for på Sikt blir ein fyllefrisk. skulle ynskje eg var på Sikt.

hjå fretex kan ein få tak i mykje som er bra og fint

også denne fine publikasjonen